सन १९६० मध्ये महाराष्ट्र राज्याची निर्मिती झाल्यानंतर चंद्रपूर हा राज्यातील एक जिल्हा म्हणून गणला जाऊ लागला. हळूहळू चंद्रपूरचा विस्तार होऊ लागला व चंद्रपूर मध्ये एकूण पंधरा तालुके झाले. चंद्रपूर च्या उत्तरेस नागपूर, वर्धा, भंडारा असून पूर्वेस गडचिरोली आहे. दक्षिणेस तेलंगनामधील आदिलाबाद जिल्हा असून पश्चिमेस यवतमाळ हा जिल्हा आहे. निसर्गाने चंद्रपूरला सुपीक जमीन, खनिज साठा व सोबतच ४२ टक्के क्षेत्रफळ व्यापणारी हिरवीगार नगरी दिली आहे. जिल्ह्यात वनक्षेत्र ४८३४.८८ चौ. कि.मी. आहे. जिल्ह्यात उत्कृष्ट दर्जाचे सागवान लाकूड मोठ्या प्रमाणात उत्पादित होते व सोबतच जळाऊ लाकूड, तेंदूपत्ता, बांबू, डिंक इत्यादी वनउपजही आहेत. महाराष्ट्रातील प्रख्यात समाजसेवक बाबा आमटे यांनी १९४८ साली सुरु केलेला आनंदवन हा प्रकल्प वरोरा तालुक्यात कार्यरत आहे. जेथे अंध, अपंग व कुष्ठरोग्यांवर उपचार केले जातात. या सर्व गोष्टीसोबतच जिल्ह्यातील ताडोबा अंधारी व्याघ्र प्रकल्प म्हणजे चंद्रपूर जिल्ह्याचा एक महत्वाचा प्रकल्प ज्याने जागतिक स्तरावर वाघांना प्रसिद्धी मिळवून दिली. ताडोबामध्ये भ्रमंतीसाठी ऑनलाईन बुकिंग ची व्यवस्था आहे. ताडोबामध्ये भ्रमंतीसाठी खुल्या जिप्सी व खुल्या बसेसची सोय तेथील वनविभागाद्वारे करण्यात आलेली आहे. ताडोबा प्रामुख्याने रॉयल बेंगाल टायगरसाठी प्रसिद्ध आहे. २०१८-१९ च्या आकाडेवारीनुसार १०० पेक्षा जास्त वाघ ताडोबाच्या जंगलात आहेत. सोबतच ताडोबामध्ये इतर प्राणी जसे रानगाव, बिबट, बारसिंग व पर्यटनाच्या दृष्टीने वाव मिळण्यासाठी आगरझरी गेटजवळ फुलपाखरू उद्यान सुद्धा आहे.